Abongereza bangana na 51,9 % nibo baraye batoye kuva mu muryango w'ubumwe bw'uburayi,uyu mwanzuro wafashwe nk'amateka mu gihugu cy'ubwongereza ukaba uri bushimangirwe mu gitondo cyo kuri uyu wa gatanu.

 

By Umutoni Solange | Views : 7245 | Kuya 06-24-2016 07:39



Igihugu cy'ubwongereza cyari kimaze imyaka isaga 43 mu muryango w'ubumwe bw'uburayi, Abongereza bangana na 51,9 % bakaba bafashe umwanzuro wo gutora ko bawusohokamo, mu bangana na 72,2 % by'abari bitabiriye iki gikorwa cy'amatora.

     Abongereza bangana na 51,9 % batoye kuva mu muryango w'ubumwe bw'uburayi

Mu mijyi minini nka Londres n'indi batoye kuguma mu muryango w'ubumwe bw'uburayi, mu gihe mu bice by'icyaro cyane cyane mu majyaruguru no hagati mu bwongereza batoye gusohoka muri uyu muryango.

Ibitangazamakuru nka BBC, ITV na Sky News byo mu bwongereza byose byatangaje ko abongereza bahisemo kuva mu muryango wa w'ubumwe bw'uburayi.

Komisiyo yateguye aya matora yatangaje ko abanyagihugu batoye bakurikije ibibazo by’abimukira, ubwigenge bw’igihugu, umutekano, hamwe n'icyerekezo cy'igihugu mu bukungu.

 Abongereza mu matora yo kuva cyangwa kuguma mu muryango w'ubumwe bw'uburayi

Minisitiri w'intebe w’Ubwongereza David Cameron yari mu bifuzaga ko Ubwongereza bwaguma mu muryango w'ubumwe bw'uburayi.

Amakuru Umurashi ukesha ijwi ry'Amerika aravuga ko abakurikiranira hafi ibibera mu Bwongereza bari bavuze ko mugihe abanyagihugu botora kwitandukanya n’uwo muryango, David Cameron, azaba atakaje icyizere abanyagihugu bamufitiye.

Imwe mu ngaruka iyo ngingo imaze gutera, ni uko ifaranga ry’ubwongereza rya Pound rimaze guta agaciro kugera kuri 5 kw’ijana mu murwa mukuru Londres.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd