Guverinoma z’u Rwanda na Turkiya bashyize umukono ku masezerano y’ubufatanye hongerwa imbaraga mu by’umutekano usanzwe urangwa hagati y’ibi bihugu byombi. Ibi bikaba byabereye i Ankara mu murwa mukuru w’igihugu cya Turukiya ,ku wa 28 Kanama 2015, igihugu cy’u Rwanda kikaba cyari gihagarariwe na Minisitiri w’umutekano mu gihugu,  Sheikh Mussa Fazil Harerimana ubwo yari mu ruzinduko muri icyo gihugu.

 

By Ubwanditsi | Views : 11319 | Kuya 08-31-2015 04:40



Minisitiri Harerimana kandi yari kumwe n’umuyobozi mukuru wa Polisi y’u Rwanda IGP Emmanuel K Gasana, n’umuyobozi w’ishuri rikuru rya Polisi y’u Rwanda, CP Felix Ntamuhoranye.

Minisitiri  Harerimana na mugenzi we wa Turkiya Bwana Sebahattin Öztürk bashyize umukono ku masezerano yo gukaza umutekano hagati y’ibihugu byombi no kongera imbaraga mu bufatanye hagati y’ibi bihugu, harimo guhanahana amakuru no gukumira ibyaha ndengamipaka, aho Minisitiri Harerimana  yanaboneyeho gutumira mugenzi we ngo azasure igihugu cy’u Rwanda.

IGP Gasana K. Emmanuel na mugenzi we wa Turkiya nabo bashyize umukono ku masezerano yo gufatanya mu guhugura abapolisi ku birebana no kurwanya iterabwoba, kurwanya ibyaha bikorerwa mu ikoranabuhanga, mu guhugura umutwe wihariye ndetse no guhugura abarimu ba gipolisi, n’ibindi.

Amasezerano yakozwe hagati ya Polisi  z’ibihugu byombi, azafasha aba ofisiye b’igihugu cy’u Rwanda kwitabira amasomo asanzwe atangwa n’ishuri rikuru rya Polisi y’igihugu cya Turukiya, kandi ibi bizashyirwa mu bikorwa nk’uko byemeranijwe n’ubuyobozi bw’ibihugu byombi.

Minisitiri Harerimana asoza yashimiye uburyo bakiriwe na Guverinoma ya Turkiya anabizeza ko bazakora iyo bwabaga ngo umubano w’ibihugu byombi utere imbere ku bijyanye n’umutekano.

Minisitiri w’umutekano wa Turukiya, Bwana Sebahattin Öztürk yishimiye uru ruzinduko kandi anabizeza ko ibyashyizweho umukono ku masezerano bigomba kujya mu bikorwa.

Intumwa z’u Rwanda kandi zasuye bimwe mu bice bigize Polisi y’igihugu cya Turkiya, zinaganira na bo  ku birebana no kongera ubufatanye mu gukaza umutekano w’ibihugu byombi.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd