Imibare yatangajwe na Minisiteri y’uburezi y'u Rwanda kuri uyu wa Mbere tariki ya 09 Mutarama 2017, yerekana ko muri rusange abakobwa aribo baza imbere mu mubare munini w’abatsinze, ariko imibare ikagaragaza ko iyo bigeze ku gutsindira ku inota ryo hejuru, abahungu baza imbere y’abakobwa. 

 

By Ubwanditsi | Views : 12012 | Kuya 01-09-2017 10:20



Atangazaga amanota y’ibizamini bya Leta kuri uyu wa Mbere tariki ya 09 Mutarama 2017, Umunyamabanga wa Leta Ushinzwe amashuri abanza n’ayisumbuye, Isaac Munyakazi, yagaragaje ko abakobwa bakomeje kugira umubare munini w’abatsinze ikizamini cya leta.

Umubare w’abana bakoze ibizamini bose mu 2015, abakobwa bari 55%, abahungu bari 46%. Abatsinze ku inota ryafatiweho mu cyiciro cya mbere baba 6482 bangana na 4.4%.

Isaac Munyakazi yagize ati

Turishimira ko umubare wazamutse, aho bigaragara ko abana batsinze mu cyiciro cya mbere ari 9 957 bangana na 5.32%. Mu by’ukuri ni ikintu twakwishimira tugereranyije umwaka washize n’uyu mwaka wa 2016, noneho mu bindi byiciro ni ukuvuga ku cya kabiri kugeza mu cya kane, ikigaragara ni uko mu gihe ubushize bari batsindiye ku inota rya 84.8%, uyu mwaka abatsinze nanone umubare wazamutse ugera kuri 85.4%. Abahungu muri bo bakaba bangana na 44.9%, abakobwa bakaba bangana na 55.1%.”

Mu mashuri abanza, abanyeshuri bakoze ibizamini bya Leta mu 2016 bari 194 679.

Munyakazi yakomeje agira ati

Mu cyiciro rusange ho ikigaragara nabwo umubare w’abana batsinze wazamutse, aho abatsinze mu cyiciro cya mbere bavuye ku 10% mu mwaka ushize baba 11%, mu bindi byiciro bisigaye kuva ku cya kabiri kugeza ku cya kane, umwaka ushize bari batsinze kuri 87.24% ubu twakwishimira ko byazamutse bikagera kuri 89%. Abahungu bangana 47.8%, abakobwa nibo benshi batsinze kuri 52.14%.”

Aya manota uyu munsi ababyeyi n’abanyeshuri bashobora kuyabona hakoreshejwe uburyo bubiri, burimo ubwa SMS aho bakoresha 489, bagashyiraho nimero iranga umwana, cyangwa gusura urubuga rwa REB, umuntu akajya ahabugenewe, agashyiramo code y’umunyeshuri n’icyiciro yigagamo.

Umunyamabanga wa leta muri Minisiteri y’uburezi yakomeje avuga ko mbere y’uko iki cyumweru kirangira abana bose bazaba bashyizwe mu myanya, mu mashuri biga bataha n’ibigo bigamo bacumbitse.

Kuwa Mbere hakoreshejwe bwa buryo bukoreshwa mu kumenya amanota yabo, bazabona ibigo boherejwemo, bakazaba bafite icyumweru cyose cyo kwitegura no kubona ibisabwa.”

Biteganyijwe ko igihembwe cya mbere cy’umwaka w’amashuri wa 2017 kizatangira kuwa 23 Mutarama kikazarangira kuwa 31 Werurwe, kikazamara ibyumweru 10.

Igihembwe cya kabiri kizatangira kuwa 17 Mata 2017 kirangire kuwa 29 Nyakanga 2017 mu gihe kingana n’ibyumweru 15, naho icya gatatu gitangire kuwa 14 Kanama 2017 kirangire kuwa 18 Ugushyingo 2017, kikazamara ibyumweru 14.

Niba nta gihindutse, ibizamini bya leta ku bazasoza amashuri abanza mu 2017 bizaba hagati ya tariki 15-17 Ugushyingo 2017, naho ku basoza icyiciro rusange n’amashuri yisumbuye bikorwe hagati ya tariki 20 Ugushyingo n’iya 01 Ukuboza 2017.

1 Ibumoso, Umunyamabanga wa Leta Ushinzwe amashuri abanza n’ayisumbuye, Isaac Munyakazi


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd