Kuri uyu wa gatatu tariki ya 29 kamena 2016, i Kigali mu Rwanda, Minisitiri w'imari n'igenamigambi w'u Rwanda Ambasaderi Gatete Claver yatangaje ko mu mwaka wa 2020 abakene bazaba bari hasi ya 10%.

Ibi, Minisitiri Gatete yabitangaje nyuma yo kugaragaza uko ikibazo cy'ubukene mu Rwanda kifashe.

Kugirango abakene bazabe bari hasi ya 10%, Minisitiri Claver, yavuze ko bazashyira imbaraga mu kwita kuri gahunda za leta zitandukanye nk'ubudehe, Girinka, Gutanga akazi no guha Sacco imbaraga kandi hagakorwa isuzuma ryimbitse ku bitera ubukene n'uburyo abantu babuvamo.

Mu ibarura ryakozwe n'ikigo cy'igihugu cy'ibarurishamibare mu Rwanda (NISR), Murangwa Yusuf, umuyobozi mukuru w'iki kigo yatangaje ko mu isesengura ryakorewe 2010/2011 - 2013/2014, basanze hagati y'umwaka wa 2011 na 2014, ubukene bwaragabanutse ku gipimo cya 6,9%, igabanuka rya 2,3 buri mwaka bingana n'abaturage basaga 250.000.

Kuva mu mwaka wa 2011 kugera 2014, Abanyarwanda bangana na 17,4% bari bakennye bavuye muri icyo cyiciro, mu gihe abatari muri icyi cyiciro cy'ubukene bakisanzemo bangana na 10,4%.