Umusore witwa MANIRAGUHA Jean Paul w’imyaka 18 y’amavuko wagwiriwe n’itaka ku itariki 27 Gashyantare ubwo we na bagenzi be bane barimo gucukura gasegereti mu kirombe cya DUMAC Ltd kiri mu kagari ka Kigarama, ho mu murenge wa Nzige, mu karere ka Rwamagana.

 

By Habineza Gabriel | Views : 13818 | Kuya 02-29-2016 06:00



Umuvugizi wa Polisi y’u Rwanda mu ntara y’Uburasirazuba, Inspector of Police (IP) Emmanuel Kayigi, yavuze ko ejo ku itariki 28 Gashyantare inzego zibishinzwe zari ziri gufatanya gukura muri icyo kirombe uwo cyagwiriye, kandi  yongeraho ko iperereza rikomeje kugira ngo hamenyekane icyateye iyo mpanuka.

Yagize ati:"Abafite amasosiyete acukura amabuye y’agaciro ntibagomba kwirara ngo bafite ibyangombwa, n’uburyo bwo kwirinda impanuka zishobora gukomoka kuri uyu mwuga. Kubigira ni byiza ndetse yewe ni n’itegeko, ariko na none bagomba buri gihe gusuzuma ko bidashaje, baramuka basanze bishaje bakagura ibishya."

IP Kayigi yagize kandi ati:"Imirimo nk’iyi isaba uburyo bw’ubwirinzi bw’impanuka buhamye kandi bugezweho kuko iyo bigeze mu gihe cy’imvura; ubutaka buroroha cyane ku buryo bushobora gutenguka bukaba bwagwira abari munsi yabwo bari mu mirimo yo gucukura amabuye y’agaciro."

Yasabye abantu muri rusange kudacukura amabuye y’agaciro mu buryo bunyuranyije n’amategeko kandi bagatanga amakuru y’ababikora.

Polisi y’u Rwanda ikaba ikangurira abantu bakora imirimo y’ ubucukuzi bw’amabuye y’agaciro guhora buri gihe basuzuma ko nta cyabateza  impanuka aho bakorera mu birombe.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd