Abaturage bo mu murenge wa Nyakiriba mu karere ka Rubavu bakomye mu nkokora umubyeyi washakaga ‘kubamba’ ku giti umwana we w’imyaka 8, amuziza ko atakoze imirimo yo mu rugo nk’uko yabimusabye.

 

By Ubwanditsi | Views : 19929 | Kuya 03-06-2016 14:39



Bamwe muri aba baturage babujije uyu mubyeyi kwihekura, babwiye Imvaho Nshya ko mbere yo gutangira kumutera imisumari mu biganza yari yabanje kumukubita amugira intere.

Umwe muri aba baturage yasobanuye ko uyu mubyeyi usanzwe afite abana batatu badahuje se, yagiye mu kazi agasiga asabye uyu mwana we w’imyaka 8 gusigara atetse ibiryo, nyuma atahutse asanga uyu mwana atabikoze kuko yari yatinze kuva ku ishuri, aramukubita arangije agerekaho no gushaka kumubamba, abaturanyi bamutesha amaze kumukomeretsa ikiganza kimwe, andetse yeguye undi musumari ngo atere mu kindi kiganza.

Yagize ati:“Uyu mwana twasanze agiye kubambwa nka Yezu, tukaba tunenga abatumye acika (umubyeyi we), gusa nashakishwe kugira ngo ashyikirizwe inkiko.”

Umunyamabanga Nshingwabikorwa w’agateganyo w’Umurenge wa Nyakiriba, Nzitabakuze Jean de Dieu, yabwiye Imvaho Nshya ko bakimara kumva iyi nkuru bahageze bagasanga uyu mubyeyi yamaze gucika, nyuma baza kumufata ku bufatanye na DASSO.

Uyu muyobozi akomeza asobanura ko bitashobotse ko uyu mubyeyi agezwa kuri Polisi kuko yatorotse abari bamujyanye, magingo aya akaba yaraburiwe irengero.

Yagize ati:“Turasaba abaturage kwamagana iki gikora cy’ubunyamaswa, tunabasaba gushakisha uyu mugizi wa nabi kugira ngo ashyikirizwe ubutabera.”

Abaturage batabaye uyu mwana wahohoterwaga basaba ko inzego z’umutekano zakoresha uko zishoboye kose zigata muri yombi uyu mugore ukomeje kwihishahisha, yamara kuboneka ubutabera nabwo bugakora akazi kabwo.

Ntabwo ari inshuro ya mbere muri uyu murenge wa Nyakiriba hagaragara igikorwa nk’iki abaturage bita icy’ubunyamaswa, kuko ngo no mu mwaka wa 2011 hari undi mugore watwitse umwana we ibiganza, amuziza ko yamuririye ibiryo.

Srce:Imvaho Nshya



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd