Mu gitondo cyo kuri uyu wa gatanu tariki ya 21 mata 2017, Perezida w’igihugu cy’ubufaransa François Hollande, yabyutse ahamagaza inama y’umutekano kugirango basuzume iby’iki gitero cyahitanye umupolisi 1 kigakomeretsa 2, igikorwa cy’iterabwoba. 

Mu itangazo ryaraye rishyizwe ahagaragara na leta ya kisilamu ku mugoroba w’ejo kuwa kane tariki ya 20, yigambye kuba ariyo yagabye iki gitero.

Pierre-Henry Brandet, umuvugizi wa minisiteri y’umutekano yatangarije BFM TV ko ku munsi w’ejo kuwa kane, mbere ya sa tatu z’ijoro (21h00) ku isaha yo mu bufaransa, imodoka y’ivatiri yegereye imodoka ya Polisi, umuntu umwe asohokamo ahita arasa ku modoka ya Polisi.

Nyuma yo kurasa abapolisi, uyu mwiyahuzi yahise araswa n’inzego z’umutekano. 

Umutekano wahise ukazwa n’inzego z’umutekano hirya no hino mu bice by’igihugu cyane cyane mu murwa mukuru i Paris mu gihe hanabura iminsi 3 ngo habe amatora y’umukuru w’igihugu.