Umukinnyi wabiciye bigacika mu ikipe ya rayon sport, kuri ubu akaba ari muri Sunrise yo mu karere ka Nyagatare, nyuma yo gutsindwa mu mukino ubanza n'iyi kipe yahozemo, kuri uyu wa mbere yatangaje ko mu mukino wo kwishyura ukaba ari n'ikirarane uzaba kuri uyu wa gatatu, biteguye kwihimura. 

 

By Habumugisha Théoneste | Views : 6573 | Kuya 03-27-2017 11:18



Umukino wa shampiyona y'u Rwanda ikiciro cya mbere mu mupira w'amaguru wabaye hagati ya Sunrise na rayon sport i Nyagatare warangiye aba rayon begukanye intsinzi y'igitego 1 - 0.  
Mu kiganiro kigufi na Uwambazimana Léo uzwi ku izina rya Kawunga, akaba ari umukinnyi ukina mu b'inyuma mu ikipe ya sunrise yo mu karere ka Nyagatare akaba yarahoze muri rayon sport, yatangarije umurashi.rw ko biteguye kwihimura kuri iyi kipe yahozemo. 
Uwambazimana Léo :  

" Rayon sport ibyo yadukoreye ikadutsindira iwacu, nge na bagenzi bange nibyo turi kwitegura kuzayikorera i Kigali. Nibyo imaze kudutsinda 2 yikurikiranya, bwa kabiri bwo yadutsindiye mu rugo ituma dutakaza zimwe mumbaraga twari twaratangiranye shampiyona, harimo no kubura Rutamu nk'umuntu wadufashaga cyane, ariko ubu tumeze neza abakinnyi, dufite n'umutoza mushya kandi mukuru uzi shampiyona y'u Rwanda, Casa Mbungo Andrew, ni umuhanga, amaze igihe adufasha, kuri uyu wa kabiri tariki ya 28 twiteguye kugera i Kigali, tutaje gutemberera Rayon sport, ahubwo tuje kuyishyura ibyo yadukoreye idutsindira mu rugo imbere y'abafana" . 

Umutoza Casa Mbungo Andrew, yinjiye mu ikipe ya sunrise nyuma y'isezererwa ry'umunya Nigeria wirukanwe kubera gukoresha ibyangombwa mpimbano no kudatanga umusaruro yarategerejweho.  

Umukino rayon sport izakiramo sunrise utarabereye igihe (ikirarane), uteganyijwe kubera kuri stade ya Kigali i Nyamirambo kuri uyu wa gatatu tariki ya 29 Werurwe 2017 kuva 15h30.


Kawunga na bagenzi be biteguye kwihimura kuri rayon


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd