Kuri uyu wa Gatatu tariki ya 12 ukwakira 2016, Riek Machar yatangaje ko yerekeje mu gihugu cy'Afurika y'Epfo kubera impamvu zihutirwa z'uburwayi, yongeraho ko nyuma azahita ahava, ariko yirinda gutangaza igihe n'aho azakomereza urugendo rwe.

 

By Muhire Norbert | Views : 6888 | Kuya 10-12-2016 11:28



Umugabo wahoze ari visi Perezida wa Sudan y'amajyepfo, Riek Machar akaza kutavuga rumwe na Perezida w'iki gihugu bikabaviramo imirwano ikomeye, akaza guhungira i Khartoum mu murwa mukuru wa Sudan, nyuma y'imirwano yabaye mu kwezi kwa Nyakanga uyu mwaka hagati y'abamushyigikiye n'ingabo za leta ya sudan y'amajyepfo, kuri uyu wa gatatu tariki ya 12 ukwakira amaze kuva muri Sudan yerekera muri Afurika y'Epfo, aho yavuze ko ajyanwe no gukoresha ibizami by'uko ubuzima bwe buhagaze.

                                  Riek Machar ubuzima bwe bwifashe neza

Riek Machar, nyuma y'iyi mirwano, yabanje guhungira muri repubulika iharanira demokarasi ya Congo, ahagana mu mpera z'ukwezi kwa kanama aba aribwo yerekera muri Sudan.  

Kuva mu kwezi kwa Nyakanga uyu mwaka, nibwo Riek Machar yakongera kugaragara imbere y'itangazamakuru, aho kuri uyu wa gatatu tariki ya 12 ukwakira 2016, ku kibuga cy'indege cya Khartoum, yabwiraga umunyamakuru ko yerekeje muri Afurika y'Epfo kugirango akoreshe ibindi bizami by'uko ubuzima bwe buhagaze.

Riek Machar, nyuma yo kuvuga aya magambo, yongeyeho ko nyuma azahava, ariko yirinda gutangaza igihe n'aho azerekera.

Uyu mugabo yagize ati:" Ubu ngiye muri Afurika y'Epfo kongera gukoresha ibizami by'uko ubuzima bwange buhagaze, nyuma y'ibyo, nzava muri Afurika y'Epfo".

Magingo aya, ubwicanyi burakomeje muri Sudan y'amajyepfo, aho umryango mpuzamahanga wita ku mpunzi HCR, uvuga ko utewe impungenge n'ubuzima bw'impunzi zirenga 100.000 zahunze ubwicanyi mu gace ka Yei kari muri kirometero zigera ku 150 mu majyepfo y'iburengerazuba bw'umurwa mukuru Juba .


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd