Félix Tshisekedi, umuhungu wa EtiènneTshisekedi, yashinje inzego nkuru z'igihugu gushaka kuburizamo umugambi w'amatora hagamijwe kugirango perezida Joseph Kabila agume k'ubutegetsi, mu gihe Eve Bazaiba, umuhuzabikorwa w'ihuriro ry'abatavuga rumwe n'ubutegetsi, uruhande rushinzwe kubahiriza itegekonshinga, yavuze ko Kabila ariwe kibazo akaba n'igisubizo cy'ibibazo bikomeje kuvugwa muri iki gihugu.

 

By Idrissa Katumbi | Views : 3297 | Kuya 03-30-2017 14:22



Ku munsi w'ejo kuwa gatatu tariki ya 29 werurwe 2017 mu masaha ya mugitondo, ihuriro ry'abatavuga rumwe n'ubutegetsi muri repubulika iharanira demokarasi ya congo, ryandikiye umunyamabanga mushya wa ONU, Antonio Guterres, ibaruwa ishinja ubutegetsi bukuru bw'igihugu kwica amasezerano mu rwego rwo kongera gushaka gukerereza amatora hagamijwe kugumisha Joseph Kabila k'ubutegetsi, ibintu bibangamiye amahame ya demokarasi. 

Mu kiganiro n'abanyamakuru kuri uyu wa Gatatu, Félix Tshisekedi, wari uhagarariye ihuriro, yavuze ko kuwa mbere tariki ya 03 mata uyu mwaka, hazabaho umunsi wo kutagira icyo bakora, kuwa gatatu tariki 05 mata hakabaho imyigaragambyo rusange, ahagana mu ma tariki 10 mata hakazategurwa urugendo rw'amahoro. 

Eve Bazaiba, umuhuzabikorwa w'ihuriro ry'abatavuga rumwe n'ubutegetsi ushinzwe kubahiriza itegekonshinga, ku munsi w'ejo kuwa gatatu tariki ya 29 werurwe 2017, yavuze ko igisubizo cy'ibibazo biri muri repubulika iharanira demokarasi ya congo, kizaturuka kuri perezida Joseph Kabila ubwe. 

Eve Bazaiba, yagize ati: 

" twabonye ko Joseph Kabila yagumye k'ubutegetsi, nk'umuntu mukuru mu gihugu, bigaragara ko ariwe kibazo, ku rundi ruhande akaba ari nawe gisubizo, nk'ikibazo, niwe warengeje manda, nk'umuntu mukuru niwe ugomba gusuzuma ibyo arimo akora agafata icyemezo akubahiriza manda". 

Kuri Eve Bazaiba, asanga amasezerano yashyizweho umukono kuya 31 ukuboza 2016 yarahaga inshingano abanyapolitiki. 

Ibibazo by'umutekano muke bikomeje kuvugwa muri DRC. 

Mu izina rya leta y'igihugu, Lambert Mende, umuvugizi wa guverinoma, ku munsi w'ejo kuwa gatatu tariki ya 29 werurwe, yatangarije ibiro ntaramakuru by'abafaransa ko bivuye ku iperereza ryakozwe, babonye imirambo 2 y'abari mu butumwa bw'amahoro bwa ONU muri iki gihugu nyuma y'igihe baraburiwe irengero. 

Umunya Amerika, Michael Sharp n'ufite ubwenegihugu bwa Suwede na Chili, Zaida Catalan, bari baraburiye muri Kasai Central kuva tariki ya 12 werurwe uyu mwaka, babonetse barishwe. 

António Guterres, umunyamabanga mukuru wa ONU, yemeje urupfu rw'aba bantu kuwa gatatu tariki ya 29 werurwe nyuma yo kubona imibiri yabo hafi y'umugezi Moyo, muri iyi ntara ya Kasai Central.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd