Abagabo 2 batavuga rumwe n'ubutegetsi bwa Perezida Joseph Kabila muri repubulika iharanira demokarasi ya Congo, Tshisekedi na Katumbi, kuri ubu bari mu gihugu cy'ububiligi, mu itangazo rigenewe abanyamakuru bashyize ahagaragara, bavuze ko bazitabira ihuriro ry'abatavuga rumwe n'ubutegetsi rizabera i Kinshasa tariki ya 31 Nyakanga 2016.

 

By Idrissa Katumbi | Views : 10479 | Kuya 07-11-2016 11:20



Itangazo rigenewe abanyamakuru ryashyizwe ahagaragara kuri uyu wa mbere tariki ya 11 Nyakanga 2016, Etienne Tshisekedi na Moise Katumbi bagarutse ku ihuriro ( meeting ) yo kuri 31 Nyakanga, aho bavuze ko bagomba kuyitabira i Kinshasa.

                Moïse Katumbi na Étienne Tshisekedi

Nyuma yo kugirana umubonano i buruseli mu gihugu cy'ububiligi, Perezida wa UDPS, Etienne Tshisekedi na Moise Katumbi, wahoze ari Guverineri w'intara ya Katanga, bemeranyijwe kugaruka mu gihugu cyabo cya DRC ariko birinda gutangaza igihe bazagarukira.

Peter Kazadi, umujyanama mu by'amategeko wa Perezida wa UDPS, yatangarije itangazamakuru ko Etienne Tshisekedi na Moise Katumbi, bazajya i Kinshasa kwitabira ihuriro ry'amashyaka atavuga rumwe n'ubutegetsi aharanira impinduka, rizaba kuri 31 Nyakanga.

Kuri uyu wa mbere biteganyijwe ko biraba bitoroshye i Lubumbashi mu rukiko rukuru, aho hakomeza urubanza Moïse Katumbi ashinjwamo kwigarurira no kugurisha inzu ya M. Alexandros Stoupis ufite ubwenegihugu bw'ubugereki.

Moïse Katumbi wahoze ari guverineri w'intara ya Katanga muri DRC,  yakomeje kwibasirwa na leta ya Congo Kinshasa nyuma yaho imitwe myinshi itavuga rumwe n'ubutegetsi bwa Perezida Joseph Kabila muri icyi gihugu itangarije ko ariwe mukandida yizeye uzayihagararira mu matora y'umukuru w'igihugu ateganyijwe uyu mwaka.

                                Moïse Katumbi

Moïse ashinjwa ibyaha byinshi birimo kwinjiza abanyamahanga mu gihugu, byatumye leta ishyiraho impapuro zo gushaka kumuta muri yombi, kuya 20 gicurasi 2016 yafashe indege yerekeza muri Afurika y'Epfo agiye kwivuza, nyuma y'iminsi 8, kuya 28 gicurasi, akomereza ku mugabane w'uburayi bivugwa ko ahoherejwe n'abaganga kugirango bakomeze ibikorwa byo kumuvura, magingo aya akaba atari yakagaruka mu gihugu cye.

Étienne Tshisekedi wa Mulumba, yavukiye i Kananga mu cyahoze ari Congo Mbiligi tariki ya 14 ukuboza 1932, aba umugabo wamamaye cyane muri Politiki muri repubulika iharanira demokarasi ya Congo, yabaye Minisitiri w'intebe wa Zaire ku bwa Perezida Mobutu, kuri ubu ni Perezida wa UDPS ( Union pour la democratie et le progès social ).

                Étienne Tshisekedi wa Mulumba


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd