Umupolisi ushinzwe guhuza Polisi y’u Rwanda n’abaturage mu karere ka Kamonyi hagamijwe kurwanya no gukumira ibyaha muri aka karere, Assistant Inspector of Police (AIP) Athanase Niyonagira, ku itariki ya 3 Nzeri 2015, yunze imiryango y’abashakanye 150 yo muri umwe mu mirenge y’aka karere witwa Nyarubaka. Iyi miryango ikaba  yari imaze igihe itabanye neza biturutse ku makimbirane yaterwaga ahanini no kutuzuza inshingano kuri umwe muri abo bashakanye cyangwa bose no kutajya inama ku iterambere ry’imiryango yabo.

 

By Ubwanditsi | Views : 10605 | Kuya 09-05-2015 09:13



Yunganiwe muri iki gikorwa cyabereye ku biro by’uyu murenge biri mu kagari ka Kigusa na Umurerwa Marie, ushinzwe uburinganire n’iterambere ry’umuryango muri aka karere ndetse n’ushinzwe irangamimerere mu murenge wa Nyarubaka, Murenzi Pacifique.

AIP Niyonagira yabanje guha ijambo buri wese mu bagize iriya miryango maze buri wese avuga ibyamuteraga kutumvikana n’uwo bashakanye ari nabyo yahereyeho abunga no kubagira inama.

Yasobanuriye iyo miryango ko ukutumvikana mu miryango bitagira ingaruka mbi ku miryango yabo gusa ahubwo ko binabangamira ituze n’umutekano by’abaturanyi babo, aha akaba yaragize ati:"Ntushobora gutora agatotsi mu gihe hari intonganya n’imirwano mu rugo rw’umuturanyi ".

AIP Niyonagira akaba yaraboneyeho gusaba abaturage muri rusange kwirinda ikintu cyose kinyuranyije n’amategeko ahubwo bakihutira gutanga amakuru ku gihe y’uwagikoze cyangwa witegura kugikora.

Imiryango yunzwe irimo uwa Baziyaka Landouard ufite imyaka 36 n’umugore we witwa Dusabe Valérie, w’imyaka 37, bakaba batuye mu kagari ka Ruyanza n’umuryango wa Nyangezi Protogène, ufite imyaka 42 n’umugore we witwa Mukamana Jeanne,ufite imyaka 25, bakaba bo batuye mu kagari ka Nyagishubi.

Icyo abagize iyi miryango yombi y’abashakanye bavuze bari bahuriyeho n’uko amakimbirane yayirangwagamo yaterwaga ahanini n’ubusinzi no gusesagura umutungo w’urugo.

Nyuma y’iki gikorwa, iyi miryango yashimiye Polisi y’u Rwanda muri aka karere ivuga ko igaruye ituze n’ubwumvikane muri yo kandi bayisezeranya ko bazakurikiza inama yabagiriye.

Ashima, Baziyaka yagize ati:"Twahoraga mu ntonganya zidashira kubera ubusinzi bwanjye. Birumvikana neza ko umutungo w’urugo watikiriraga mu kabari. Imibanire nk’iyo ntiyashoboraga gutuma dutera imbere. Polisi y’u Rwanda yadufashije cyane kuko yagaruye ituze mu muryango wacu.Tuzakurikiza inama yatugiriye".

Yakomeje agira ati:"Sinzongera kuba nyamwigendaho ahubwo nzajya ngisha inama n’umugore wanjye. Ibyo bizatuma duha uburere bwiza abana bacu kandi twimakaze ituze mu rugo rwacu n’umutekano aho dutuye".

Yagiriye inama indi miryango yo kwirinda amakimbirane ariko noneho mu gihe habaye ukutumvikana ku kintu runaka bakegera inzego zibishinzwe kugira ngo zibagire inama cyangwa zibakiranure n’abo bafitanye ibibazo aho kwihanira.

Umugore we, Dusabe, yunzemo agira ati:"Nta mutekano warangwaga mu rugo rwacu.Ubu dutangiye ubuzima bushya,ubuzima bwo kujya inama no gushyira hamwe aho kuryana".

Nyangezi we ashima Polisi y’u Rwanda muri aka karere yagize ati:" Polisi y’u Rwanda irakabyara, yagaruye umubano mwiza mu muryango wacu. Hehe n’amakimbirane iwacu, hehe n’ubusinzi, hehe no kwirengangiza inshingano zanjye".

Umugore we, Mukamana nawe yagize ati:"Nzajya nicisha bugufi kugira ngo amahoro arusheho guhinda mu muryango wacu. Ubu dutangiye ubuzima bushya buzira umwiryane kubera inama twagiriwe na Polisi y’u Rwanda muri aka karere".

Yagiriye inama abagore kuba ba mutima w’urugo no kujya bajya inama n’abo bashakanye aho guhangana no kwitana ba mwana ku bibazo bireba imiryango yabo ahubwo bakajya inama y’uko babicyemura.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd