Nyuma y'inkubi y'imiyaga ivanze n'imvura yiswe Matthew yabaye mu gihugu cya Haïti mu ijoro ryo ku cyumweru rishyira kuwa mbere tariki ya 03 Ukwakira 2016, ku munsi w'ejo kuwa gatatu hashyizwe ahagaragara imibare y'abahitanwe n'ibi biza, aho abagera kuri 23 bahasize ubuzima abandi 3 bakaburirwa irengero.

 

By Umutoni Solange | Views : 12075 | Kuya 10-06-2016 11:08



Ku munsi w'ejo kuwa Gatatu Tariki ya 05 ukwakira 2016, ubuyobozi bw'igihugu cya Haïti bwashyize ahagaragara imibare y'abahitanwe n'inkubi y'imiyaga ya Matthew yari ivanzemo n'imvura ikibasira icyi gihugu mu ijoro ryo ku cyumweru tariki ya 02 ukwakira rishyira kuwa mbere tariki ya 03 ukwakira 2016.

Iyi mibare igaragaza ko muri  Haïti abantu bagera kuri 23 bahasize ubuzima, abandi 3 bakaburirwa irengero.

Edgar Célestin, umuvugizi w'urwego rushinzwe kurinda ubuzima bw'abaturage mu gihugu cya Haïti nyuma yo gutangaza iyi mibare, yavuze ko bari gukora ibishoboka byose kugirango bafashe abaturage bibasiriwe cyane n'ibi biza aho benshi banatangiye no kwibasirwa n'icyorezo cya choléra.

Perezida w'agateganyo w'igihugu cya Haïti, aherekejwe n'ambasaderi wa leta zunze ubumwe z'Amerika Peter Mulrean hamwe n'umuyobozi w'urwego rushinzwe kurinda abaturage b'aba sivile Alta Jean-Baptiste, ubwo yifashishaga indege mu gusura abaturage bari mu bice byibasiriwe cyane n'ibi biza mu gitondo cyo kuwa gatatu tariki ya 05 ukwakira, yavuze ko bahangayikishijwe cyane n'ubuzima bw'abaturage.

Kubera iyi nkubi y'imiyaga ivanzemo n'imvura yaibasiye igihugu cya Haïti, byatumye abaturage basaga 21 000 bakurwa mu byabo, amazu agera ku 2000 arangirika, amashuri 10 arasenyuka.

                                           Ikiraro cyasenywe n'umuyaga wa Matthew muri Haïti


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd