Kuri uyu wa kane tariki ya 07 Nyakanga 2016, i Goma mu ntara ya Kivu y'amajyaruguru y'igihugu cya repubulika iharanira demokarasi ya Congo, hatangiye inama yiga ku bijyanye n'umutekano mucye n'ibikorwa by'iterabwoba bikomeje kwibasira akarere k'ibiyaga bigari.

 

By Idrissa Katumbi | Views : 9765 | Kuya 07-07-2016 14:02



Abateraniye muri iyi nama bararebera hamwe uko barandura burundu ikibazo cy'umutekano mucye n'iterabwoba byayogoje akarere k'ibiyaga bigari, by'umwihariko igihugu cya repubulika iharanira demokarasi ya Congo kimaze imyaka myinshi cyarabaye indiri y'umutekano mucye n'iterabwoba kubera imitwe yitwaje intwaro ikivugwamo.

Ku isonga haza inyeshyamba z'abagande zibumbiye mu mitwe nka ADF na LRA, byamaze kwemezwa n'imiryango mpuzamahanga ko ari imitwe y'iterabwoba.

Sosiyete sivile muri Kivu y'amajyaruguru yatangaje ko abarwanyi b'umutwe wa ADF bamaze imyaka isaga 20 ku butaka bwa DRC, kuva mu kwezi k'ukwakira 2014 kugera ubu, uyu mutwe ukaba umaze guhitana abaturage b'inzirakarengane bagera kuri 1125 mu gace ka Beni.

Ikindi kibazo kiri ku isonga mu biganirwaho muri iyi nama, ni ikijyanye n'umutwe wa FDLR nawo umaze imyaka irenga 20 ku butaka bwa DRC, uyu mutwe nawo ukaba ushinjwa gusiga ukoze jenoside mu Rwanda, ugahungira muri Congo aho naho wakomeje ibikorwa by'ubwicanyi.

Muri iyi nama haranasuzumwa uko hakemurwa ikibazo kijyanye n'aborozi bitwaza intwaro biswe Mboboro, mu gushaka ubutaka bororeramo hagati ya Uganda na Sudan y'Amajyepfo bahungabanya umutekano w'abaturage.

    Goma : Inama ku mutekano mucye n'iterabwoba mu karere k'ibiyaga bigari 7- 8.07.2016

Iyi nama y'iminsi 2 yatangiye kuri uyu wa kane, ihuje abayobozi b'intara mu gihugu cya DRC bahana imbibi n'ibihugu 4 by'ibituranyi, na ba minisitiri bashinzwe umutekano mu bihugu nka Sudani y'Amajyepfo,Uganda,Rwanda,Tanzanie,Burundi na RDC.​


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd