Agatsiko ko mu mutwe w’inyeshyamba wa Maï-Maï kitwa FAAL-Alléluia kayobowe n’uwitwa  Yakutumba ku wa Kabiri taliki ya 1 Nzeri ,2015 ahitwa  Fizi  mu Ntara ya Sud-Kivu muri Republika iharanira Demokarasi ya Congo bivuganye abasirikare  2 ba Leta  bakomeretse abandi  3 ubwo bari  ku mutekano.

 

By Ubwanditsi | Views : 23268 | Kuya 09-03-2015 07:26



Nk’uko bitangazwa na Radio Okapi dukesha iyi nkuru ngo  iki gitero  kikaba cyarabaye  ubwo abasirikare bo muri Batayo ya 3311 bacungana umutakano  mu musozi wa  Mizinga wo mu ishyamba rya  Ngandja.

Okapi ikomeza ivuga ko  muri aba basirikare bishwe na Maï-Maï harimo n’umusirikare mukuru wari ushinzwe  ibikorwa bya gisirikare muri aka gace mu gikorwa cyiswe Sokola II  muri Sud-Kivu.

Bamwe mu barwanyi b'umutwe wa  Maï-Maï

Uyoboye  ingabo za Congo  muri iyi ntara  Gen.Bwange Safari akaba yemeje aya makuru aho yavuze ko  iki gitero cyabaye ubwo abasirikare bacungaga umutekano  ku musozi wa Mizinga  gusa akaba atagize byinshi atangaza ku mubare  w’abasirikare bahitanywe n‘iki gitero bagabweho na Maï-Maï.

Iki gitero  kikaba gihitanye  2 nyuma y’uko abandi basirikare  6 ba Repubulika iharanira Demokarasi ya Congo(FARDC) ku wa Mbere taliki 31 Kanama,2015   basize ubuzima mu gitero  nyuma y’uko imodoka barimo yarashwe igisasu bageze ahitwa  Rugari mu Karere ka Rutshuru kuri kilometero 50 uvuye mu mujyi wa Goma mu Ntara ya Kivu ya Ruguru.

Abayobozi b’ibanze muri aka gace kabereyemo iki gitero  bakaba baratangarije Radio Okapi ko  iyi modoka ya FARDC yari ivuye i Rutshutu yerekeje i Goma aho  abantu bataramenyekana bayirashe  igisasu cyo mu bwoko bwa roquette.

Ubuyobozi bwongeraho ko  abasirikare bahise baza ari benshi gukaza umutekano muri aka gace kugirango hamenyekane  uwaba  yihishe inyuma y’iki gitero.

Ngo imodoka  zitari iza Leta zikaba zarabujijwe kugenda akanya gato  ndetse n’abaturage muri aka gace kabereyemo iki gitero bakaba bafite ubwoba  ko bafite  kwibasirwa n’ibitero  by’abantu bitwaje intwaro.

Ibitero bya hato na hato by’abantu bitwaje intwaro bikaba bikunze kwibasira  imodoka  z’ingabo za Repubulika iharanira Demokarasi ya Congo(FARDC)  aho bihitana abasirikare.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd