Christophe Lutundula, umwe mu bagize ihuriro ry'abatavuga rumwe n'ubutegetsi bwa repubulika iharanira demokarasi ya congo yashinje Guverinoma y'iki gihugu kugira ubushake buke mu gutegura amatora y'umukuru w'igihugu uyu mwaka nyuma yo gutangaza ko bigoranye kubona amafaranga yo gushyira mu matora, ayisaba no kwegura kuko ntacyo ibashije.

 

By Idrissa Katumbi | Views : 5523 | Kuya 02-16-2017 10:23



Ashingiye ku ngengo y'imari yatangajwe na minisitiri w'imari muri iki gihugu cya Repubulika iharanira demokarasi ya congo kuwa gatatu tariki ya 15 gashyantare 2017 aho yavuze ko bigoranye ko guverinoma yabona miliyari 1,8  y'amadorali y'Amerika yo gushyira mu matora, Christophe Lutundula, umwe mu bagize ihuriro ry'abatavuga rumwe n'ubutegetsi, yashinje guverinoma ubushake buke bwo gutegura amatora y'umukuru w'igihugu ateganyijwe uyu mwaka. 

Christophe Lutundula, yagize ati:  

" nyuma y'ibi byatangajwe na Guverinoma, biratangaje cyane, nta bushake na buke bafite bwo gutegura amatora, niyo mpamvu hagomba kubaho ibiganiro na komisiyo y'amatora (CENCO), bivuze ko niba Guverinoma ivuga ko idafite ubushobozi bwo gutegura amatora, iyo Guverinoma igomba kwegura kuko nta kindi ibashije". 

Christophe Lutundula, yavuze ko ihuriro ry'abatavuga rumwe n'ubutegetsi ritazemeza icyemezo cya minisitiri w'imari kubera ko Commission électorale nationale indépendante (CENI) yamaze gutangiza imyiteguro y'amatora kandi ko umubare w'amafaranga ikeneye ugomba kuba munsi y'uwatangajwe n'uyu mu minisitiri. 

Lutundula, yagize ati: 

" minisitiri w'imari yatangaje miliyari 1 na miliyoni 800 z'amadorali y'Amerika, mu gihe mbere y'uko hajyaho ubuyobozi bw'ubu bwa komisiyo y'amatora mbere y'urupfu rwa Malumalu, hari hasabwe Miliyoni 800 z'amadorali y'Amerika gusa. kuva ubu buyobozi bushya bwajyaho, hari ibyakozwe, hari amafaranga yasohowe, hanabayeho inkunga ya MONUSCO yatanze ibikoresho n'abatekinisiye 150 bazafasha mu matora, ese ubwo Guverinoma iracyavuga miliyari 1,8  y'amadorali y'Amerika?".

Imishyikirano yasinywe mu kwezi k'ukwakira, ikongera mu kwezi k'ukuboza tariki ya 31 umwaka ushize, hagati y'ubutegetsi n'abatavuga rumwe nabwo, yavuze ko amatora y'umukuru w'igihugu n'ay'abagize inteko ishingamategeko agomba kuba yarabaye mbere y'uko umwaka wa 2017 urangira. Guverinoma ikayoborwa n'umuntu uturuka mu ihuriro ry'abatavuga rumwe n'ubutegetsi. 

                                    Christophe Lutundula


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd