Ku mugoroba wo kuwa gatatu tariki ya 12 mata 2017, imikino ya 1/4 ihuza amakipe ya mbere ku mugabane w'uburayi (Champions League), yaraye ikomeje, Cristiano Ronaldo rutahizamu wa Real Madrid yaraye afashije ikipe ye gutsinda umukino nyuma yo kuyinjiriza ibitego 2, mu mukino waraye ubahuje na Bayern Munich yari iwayo mu Budage.

 

By Habumugisha Théoneste | Views : 2373 | Kuya 04-13-2017 09:30



Umukino waraye uhuje Real Madrid yo mu gihugu cya Espagne na Bayern Munich yo mu Budage, waje kurangira Real itsinze ibitego 2 kuri 1 cya Bayern.

Uyu mukino wabereye kuri stade Allianz Arena mu Budage, witabirwa n'abantu basaga 70000, uyoborwa n'umusifuzi w'umutaliyani witwa Nicola Rizzoli.

Bayern Munich niyo yafunguye amazamu ku munota wa 25 w'umukino ku gitego cyinjijwe na Arturo Vidal, waje no kurata Penaliti ku munota wa 45.

Ku munota wa 47, Cristiano Ronaldo rutahizamu wa Real Madrid, yaje guhita yishyura igitego bari batsinzwe, ku munota wa 77 ahita ashyiramo n'ikindi gitego, umukino aba ari nako waje kurangira ari ibitego 2 bya Real Madrid na 1 cya Bayern Munich.

Atletico Madrid, iwayo muri Espagne, yaraye itsinze Leicester City yo mu bwongereza igitego 1 kuri 0, cyinjijwe kuri Penaliti  na Antoine Griezmann ku munota wa 28.

Undi mukino waraye ubaye kuwa gatatu tariki ya 12 wari wasubitswe kubera igisasu cyaturikiye mu Budage, Borussia Dortmund yaraye itsindiwe iwayo na Monaco yo mu bufaransa ibitego 2 - 3.

Ibitego 3 bya Monaco byatsinzwe na Kylian Mbappe Lottin kumunota wa 19, Sven Bender witsinze ku munota wa 35, Kylian Mbappe Lottin ashyiramo icya 3 ku munota wa 79.

Ibitego 2 bya Borussia Dortmund byinjijwe na Ousmane Dembele ku munota wa 57 na Shinji Kagawa ku munota wa 84.

Kuwa kabiri tariki ya 11, Barcelona yahuye n'uruva gusenya mu butaliyani ihatsindirwa ibitego 3 - 0, mu mukino yakiriwemo na Juventus.

Ibitego 3 bya Juventus byatsinzwe na Paulo Dybala ku munota wa 7 n'uwa 22, ikindi cya gatatu gitsindwa na Giorgio Chiellini ku munota wa 55.

 Cristiano Ronaldo yafashije Real Madrid gutsindira Bayern Munich iwayo mu Budage




Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd