Komisiyo y’Igihugu yo kurwanya Jenoside yagaragaje ibimenyetso simusiga byerekana uruhare rwa Munyakazi Léopold muri Jenoside yakorewe Abatutsi mu Rwanda, usigaye uba muri Leta Zunze ubumwe za Amerika mu buhungiro, inasaba ko yahita yoherezwa mu Rwanda nta mananiza.

 

By Ubwanditsi | Views : 11529 | Kuya 09-24-2015 06:26



Mu itangazo iyi komisiyo yashyize ahagagara ivuga ko mu rwego rwo gukora kimwe mu biri mu nshingano zayo, ari cyo kurwanya ukudahanwa kw’icyaha cya Jenoside ndetse no kuyihakana, Komisiyo y’Igihugu yo Kurwanya Jenoside (CNLG) yasabye byihutirwa ko Munyakazi Léopold yakoherezwa mu Rwanda kugira ngo agezwe imbere y’ubutabera maze abazwe ibyaha by’indengakamere yakoze mu gihe cya Jenoside yakorewe Abatutsi.

CNLG ivuga ko ifite ibimenyetso bifatika byerekana ko Munyakazi Léopold arangwa n’ingengabitekerezo y’ivanguramoko, akanaba mu bacuze umugambi wa Jenoside, akayishishikariza abayikoze ndetse nawe ubwe akayigiramo uruhare rutaziguye.

Dr Bizimana Jean Damascène, Umunyamabanga Nshingwabikorwa wa CNLG

Umwirondoro wa Munyakazi Léopold n’uko abayeho muri iyi minsi


Munyakazi Léopold ni umunyarwanda, akaba mwene Kanyamijanju Gérard na Nyirakabano Agnès.

Yavutse mu 1950 mu yahoze ari Selire Kirwa,Segiteri Kirwa, Komini Kayenzi, Perefegitura ya Gitarama.

Mu 1994, yabaga muri Selire Bwahirimba, Segiteri Rugenge, Komini Nyarugenge muri Perefegitura y’Umujyi wa Kigali. Yashakanye na Mukantabana Catherine bakaba bafitanye abana bane.

Yigishije muri Kaminuza Nkuru y’u Rwanda kuva mu 1984 kugeza mu 1992, anaba Umunyamabanga Mukuru w’ishyirahamwe ryari rikomeye ry’abakozi bo mu Rwanda ryari ryarashyizweho nkana na Leta y’u Rwanda ryari rizwi kw’izina rya CESTRAL kuva mu 1992 kugeza mu 1994 ubwo Jenoside yabaga.

Ubushinjacyaha bukuru bw’u Rwanda bwamushinje icyaha cya Jenoside maze afungirwa mu Rwanda kuva mu 1994 kugeza mu 1999 ubwo yarekurwaga by’agateganyo.

Kuva muri 1999 kugeza muri 2004, yigishije mu Ishuri Rikuru Nderabarezi rya Kigali (KIE),ishuri rikuru ryigisha abazaba abarimu mu mashuri yisumbuye.

Ubu, Munyakazi Léopold aba muri Leta Zunze Ubumwe za Amerika aho yabonye ubuhungiro kuva mu 2004 atinya gukurikiranwa n’ubutabera kubera uruhare yagize muri Jenoside yakorewe Abatutsi mu 1994.

Mu ijoro ryo kuwa 4 Nzeli 2015, Munyakazi Léopold yafashwe n’inzego za Amerika zishinzwe abinjira, ashinjwa kuba ari ku butaka bwa Amerika ku buryo butemewe n’amategeko.

CNLG ishyigikiye ko uyu muntu uregwa icyaha cya Jenoside yakoherezwa mu Rwanda kugira ngo agezwe imbere y’ubutabera bw’igihugu avukamo. Ni bwo buryo bwa ngombwa bwo kurwanya umuco wo kudahana, gukumira Jenoside no gushaka inzira y’ubwiyunge bw’Abanyarwanda.

Yakwirakwije mu ruhame ingengabitekerezo yo kwanga urunuka no guheza Abatutsi’


Komisiyo y’Igihugu yo kurwanya Jenoside, ivuga ko Munyakazi ari mu gatsiko k’abo yita ‘abanyabwenge b’intagondwa’ bari kw’isonga ry’abacuze bakanakwirakwiza umugambi w’ingengabitekerezo igamije guheza Abatutsi mu mashuri no mu kazi.

Ngo afatanije n’abarimu bo muri Kaminuza Nkuru y’u Rwanda nka Laurien Uwizeyimana, Maniragaba Balibutsa, Ferdinand Nahimana, Jean-Damascène Nduwayezu n’abandi, Munyakazi ngo yanditse anakwirakwiza ku mugaragaro inyandiko zangisha zikanasebya Abatutsi kandi zemeza ko bagomba kuvutswa uburenganzira bwabo bwo kwiga no gukora akazi.


Dr Bizimana Jean Damascène, Umunyamabanga Nshingwabikorwa wa CNLG avuga ko nk’uko bizwi, mu myaka 1980, ubutegetsi bwa Habyarimana bwashyizeho politike yitwa iy’iringaniza ry’amoko n’uturere yemereraga Abatutsi imyanya igera kuri 10% gusa.

Ibi byagize ingaruka mbi cyane ku burere bw’abana b’Abatutsi kuko benshi batabashije kwiga kandi bwari uburenganzira bwabo ntakuka nk’uko biri mu mahame ngenderwaho y’ubutabera mpuzamahanga.

Nk’umwarimu wo muri kaminuza, Léopold Munyakazi yashyigikiye iri vangura anemeza ko rifite ishingiro n’impamvu.

CNLG ivuga ko kimwe mu bimenyetso byerekana ko Munyakazi Léopold yari ashyigikiye iyi politike yo kwanga no guheza Abatutsi, ni inyandiko yasohoye muri 1991 mu kinyamakuru Dialogue n0 146 cyo muri Gicurasi – Kamena 1991.

Muri iyo nyandiko, yemezaga ko 90% by’Abatutsi bagomba guhezwa mu mashuri no mu murimo.

Iri shyigikirwa ry’ubutegetsi buheza, bukozwe n’umuntu ufatwa nk’umunyabwenge, byatumye ubu butegetsi bukomeza ubukana kugeza ubwo buteguye Jenoside yakorewe Abatutsi muri 1994 nk’igikorwa cya rurangiza cyuzuza umugambi wa politike.


Inyandiko nk’izi zirerekana ko Munyakazi Léopold, kuva ndetse imyaka itatu mbere ya Jenoside, yari ashyigikiye nkana ingengabitekerezo yo kwanga Abatutsi urunuka.

CNLG ishimangira ko yakomeje kugira uruhare mu bitekerezo nk’ibi ubwo mu 1992 yajyaga mw’ishyaka ry’intagondwa ryitwaga MDR akanakora n’ibikorwa bijyanye n’icyaha cya Jenoside ku buryo butavuguruzwa muri 1994.

Gushishikariza rubanda ku buryo butaziguye gukora Jenoside
Itangazo CNLG yashyize ihagaragara rivuga ko Munyakazi Léopold ari mu bashishikarije Abahutu gutsembatsemba Abatutsi.

Tariki ya 18 Mata 1994, yagiye mu gace avukamo maze abonana na Burugumesitiri wa Komini witwaga Mbarubucyeye Yohani nawe uri mu buhungiro mu Bufaransa ubu.

Munyakazi ngo yahise atangira gufatanya n’uyu Burugumesitiri mu gikorwa cyo gushyira Jenoside mu bikorwa muri Komini Kayenzi.

Yemeje Burugumesitiri Mbarubukeye ko FPR n’Abatutsi bica buri muhutu babonye aho banyuze hose, none ko hagomba gutegurwa uko Abahutu birwanaho.

Burugumesitiri yahise atumiza inama y’abaturage kuri 19 Mata 1994. Muri iyo nama yabereye kuri Selire Kirwa aho avuka.

Iri tangazo rivuga ko Munyakazi Léopold, afashe imbunda mu ntoki yahawe na Burugumesitiri Mbarubukeye, yafashe ijambo mu ruhame maze asobanurira Abahutu bari aho ko kuva na kera na rindi Abatutsi ari abagome mu mibereho yabo.

Avuga ko yavuye iwe i Kigali ameneshejwe n’Abatutsi kandi ko iwe bahasahuye bakamutwara ibyo atunze byose.

Yongeyeho ko aho yanyuze hose ava i Kigali yasanze Abahutu barangije akazi ko kwica Abatutsi, ko Kayenzi ari yo isigaye yonyine.

Yahise ategeka “interahamwe” guhiga icyitwa Umututsi aho yaba ari hose, anazitegeka kwambara amashara kugira ngo bitandukanye nabo. Ngo bamaze kubyumvikanaho, bambaye amashara, maze bicamo ibice bibiri. Munyakazi Léopold yagiye mu gice cyagiye kwica kwa Felesiyani Ugirashebuja.

Muri iyo nama, hari abandi bantu bakomeye bakomoka muri Komini Kayenzi ari bo: Konseye wa Segiteri Myandagara Jean Damascène, Nkundiyaremye Alphonse, Nsanzamahoro Isidore, Nkuriyijuru Jean Marie Vianney, Sibongaya Faustin n’abandi. Icyo gihe nibwo Jenoside yatangijwe ku mugaragaro.

Kugira uruhare rutaziguye mu bikorwa bya Jenoside
Komisiyo y’Igihugu yo Kurwanya Jenoside (CNLG) ivuga ko ifite ibimenyetso ntakuka byerekana ko mu kwezi kwa kane 1994, Munyakazi Léopold ubwe yakoze ibikorwa bijyanye n’icyaha cya Jenoside.

Muri byo twavuga nko kugenzura ibyakorerwaga kuri za bariyeri muri Komini Kayenzi aho bagenzuriraga indangamuntu, bakarobanuramo Abatutsi bagahita babica.

Ibi bikorwa yabifatanyije na Bosco Niyonsaba, wari umuganga w’amatungo muri Komini, Sebushishi Simon, Nkundiyaremye Alphonse, Mureke Gabriel n’abandi bari mu mitwe yitwara gisirikare.

Munyakazi Léopold we ubwe yishe Ugirashebuja Felesiyani wari utuye muri Selire Kirwa akoresheje imbunda yari afite kandi ari kumwe n’abandi bicanyi bari kumwe nawe mu itsinda ry’abagizi ba nabi. Niwe wahaye abicanyi uwitwa Kamagaju wahise wicwa akanajugunywa muri Nyabarongo.

Yahungiye muri Leta zunze Ubumwe za Amerika kugira ngo acike ubutabera
Iri tangazo rya CNLG rivuga ko mu biganiro bitandukanye yagiye agirana n’itangazamakuru muri Leta zunze Ubumwe za Amerika, Munyakazi Léopold avuga ko atangazwa n’ibirego bimushinja kugira uruhare muri Jenoside kandi yarafunguwe mu 1999 ubwo yari mu Rwanda kubera ko umushinjacyaha nta cyaha yari yamubonyeho.

Anemeza ko afite impapuro zerekana ko yarekuwe nta zindi nzitizi zisabwa n’ubutabera bw’u Rwanda (AFP, 04/02/2009).

CNLG ivuga koi bi ari ibinyoma bigamije kumvisha abayobozi ba Amerika ko batagomba kumwohereza mu gihugu avukamo.

Kuri iyi Komisiyo, inyandiko yemeza irekurwa rye by’agateganyo yanditswe n’ubushinjacyaha bwa Gitarama, tariki ya 27 Kanama 1999, yerekana neza ko hari ibyo agomba kubahiriza birimo kutarenga imbibi z’Akarere yari atuyemo nta ruhushya rw’umucamanza ukurikirana urubanza rwe cyangwa se urw’umusimbura we, kutajya mu mahanga, kwitaba umucamanza ukurikirana urubanza rwe buri wa gatanu wa nyuma w’ukwezi.

Kuba Munyakazi Léopold, muri 2004 yarabashije guca mu rihumye abashinzwe abasohoka mu Rwanda akarenga ku byo yari yasabwe kubahiriza akagera muri Amerika, ntabwo ari amakosa y’abo bakozi. Ibi birerekana ko Munyakazi Léopold adafite uburenganzira, nk’uko ariho abikora ubu, bwo kwemeza ko yavuye mu Rwanda ku buryo bukurikije amategeko. CNLG ivuga ko yahunze u Rwanda akoresheje uburiganya kugira ngo atoroke ubutabera bwamukurikiranaga nk’uwateguye Jenoside.

Umurava ukataje mu bikorwa byo guhakana Jenoside


Icyemezo 2150 (cyo mu 2004) cy’Akanama gashinzwe umutekano gihamagarira ibihugu byose biri mu muryango mpuzamahanga (ONU) kurwanya ihakana rya Jenoside iyo ari yo yose yemewe na Loni, ndetse no gushyiraho amategeko ahana icyo cyaha.

CNLG ivuga ko Munyakazi Léopold ari mu bantu bahakana bivuye inyuma Jenoside yakorewe Abatutsi, haba mu bikorwa bye, mu magambo ndetse no mu myitwarire, yerekanye inshuro nyinshi ko Abatutsi batigeze bicwa.

We yemeza ko mu Rwanda habayeho gusa intambara hagati y’abaturage, ko nta Jenoside yigeze iba ( bigaragara mu kinyamakuru Associated Press Writer, cyo muri Gashyantare 2, 2009).

Ibi bimenyetso byagaragajwe na CNLG muri iyi nyandiko ku ruhare rwa Munyakazi Léopold muri Jenoside yakorewe Abatutsi ivuga bifite uburemere budasanzwe kandi byumvisha ko agomba kugezwa imbere y’ubutabera nta mananiza.

Kubera iyo mpamvu, Komisiyo y’Igihugu yo Kurwanya Jenoside (CNLG) irasaba ko harebwa uko Munyakazi Léopold yakoherezwa mu Rwanda nta zindi nzitizi kugira ngo aburane.

CNLG ivuga ko byaba ari isomo kuri buri wese wibwira ko yacitse ubutabera nyuma yo gucura umugambi wa Jenoside akanayishyira mu bikorwa. Bwaba kandi ari ubutabera nyabwo.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd