Kuri icyi cyumweru,imikino y’igikombe cya Afurika ku bakinnyi bakina imbere mu gihugu (Chan) yakomeje,imikino 2 akaba ariyo yabaye kuri uyu munsi,aho kuri stade Amahoro amavubi y’u Rwanda yahuye na Morocco,Cote d’Ivoire igahura na Gabon.

 

By Muhire Norbert | Views : 13566 | Kuya 01-24-2016 10:56



Maroc yari ifite akazi katoroshye, kuko yari gukomeza mu cyiciro gikurikira iyo itsinda Amavubi ndetse na Gabon igatsinda Cote d’Ivoire. Amahirwe yo gukomeza mu irushanwa kuri Maroc yarangiye ikaba igomba guhita ifata indege igasubira iwabo i Rabat.

Muri uyu mukino umutoza Johnny Mckinstry yari yakoze impinduka, aruhutsa bamwe mu bakinnyi kuko yari yamaze kwizera itike ya 1/4 bidasubirwaho.

Mu bakinnyi yaruhukije harimo na kapiteni Jacques tuyisenge, Emery Bayisenge watsinze igitego ku mukino wa mbere, Ernest Sugira watsinze ibitego bibiri ku mukino wa kabiri na Iranzi Jean Claude wagiye azonga cyane amakipe yakinnye n’Amavubi mu mikino ibanza.

Umukino watangiye stade itaruzura abafana kubera imvura yabanje kugwa ari nyinshi, nyuma y’iminota mike umukino utangiye abafana bari bamaze kwiyongera muri stade. Mu mbyino n’indirimbo zari zuzuye morale nyinshi, abafana basabaga Amavubi kwiba umugono Maroc bakayitsinda igitego cyo mu minota ya mbere.

Ku munota wa 16 gusa Maroc yaje izi neza ko nta yandi mahitamo ifite uretse kwihambira ku Mavubi, yafunguye amazamu ku ishoti ryiza rya Abdelghani Mouaoui, nyuma y’uko habayeho kutumvikana kwa ba myugariro b’u Rwanda.

Nyuma y’iminota ibiri gusa, u Rwanda rwabonye amahirwe yo kwishyura ku mupira wari uzamukanywe na Savio Nshuti Dominique, ariko ntihagira ikintu ubyara.

Amavubi yatsinzwe igitego cya kabiri ku munota wa 23 kuri koruneli, Mohamed Aziz ashyiraho umutwe, Olivier Kwizera ntiyakurikira.

Umukino wihutaga cyane umupira uva ku izamu rimwe ujya ku rindi.

Ku munota wa 26 Ngomirakiza Hegman yahagurukije abafana yishyura igitego kimwe muri bibiri Amavubi yari yatsinzwe.

Ku munota wa 37, ku makosa ya Rusheshangoga Michel utabashije guhagarika umukinnyi wa Maroc yateye umupira mu rubuga rw’amahina maze Abdeladim Khadrouf wa Maroc ashyiraho umutwe iba itsinze igitego cya gatatu.

Igice cya mbere kibura iminota ibiri, Maroc yakinaga nk’ikipe ifite intego, yabonye igitego cya kane, cyatsinzwe na Mouaoui, wari urungurutse mu rushundura ubugira kabiri.

Umutoza yahise akora impinduka zihuse, asohora Rusheshangoga wagize ikibazo cy’imvune.

Igice cya kabiri nta gishya cyazanye kuko amakipe yombi yakomeje gukinira hagati mu kibuga bisa nk’aho Maroc yamaze kwizera itsinzi ariko n’Amavubi ukabona nta bushake bwo gushaka ibitego nk’uko byabaga bimeze mu mikino ibiri ya mbere.

Abafana b'amavubi bagaragaje kutishimira akayabo k'ibitego 4 batsinzwe.

Huye: Cote d’Ivoire yanyagiye Gabon

Mu mukino wabereye i Huye wo muri iri tsinda, Cote d’Ivoire yanyagiye Gabon ibitego 4-1.

Ikipe y’Amavubi izamutse muri 1/4 iri ku mwanya wa mbere, ikurikiwe na Cote d’Ivoire zombi zifite amanota atandatu.

U Rwanda rutegereje imikino ya nyuma yo mu itsinda B kugira ngo rumenye igihugu kizazamuka ari icya kabiri ruzahura na cyo; amahirwe menshi ari hagati ya Cameroun na Ethiopia.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd