Umwe mu bari abayobozi bakuru b’igisirikare mu mutwe wa FDLR nyuma akaza gutaha yitandukanyije nawo, Ntibibaza Gerard yamennye amabanga menshi y’uyu mutwe umaze imyaka myinshi mu mashyamba ya Congo arimo umubare nyakuri w’abarwanyi, aho baherereye mu mashyamba, aho bakura amafaranga n’amikoro ya buri munsi.

 

By Ubwanditsi | Views : 187635 | Kuya 10-30-2015 10:16



Uyu mugabo bigaragara ko akomeye aherereye mu kigo cy’i Mutobo aho akurikirana amasomo yo ku musubiza mu buzima busanzwe.

Ntibibaza Gerard wari ufite ipeti rya Lieutenant Colonel yatangaje amakuru menshi kuri uyu mutwe usigaye waranahawe akazina k’abacunguzi n’abawushyigikiye biganjemo abatanyuzwe n’imiyoborere iriho mu Rwanda.

Ibihumbi bitanu by’abarwanyi ba FDLR niwo mubare Lt Col Ntibibaza Gerard wari ushinzwe ibiro bya mbere (J1) muri FDLR akitandukanya nawo agataha mu Rwanda tariki 18 Nzeri 2015, avuga ko ariwo mubare yasize wanditse mu bitabo.


Bamwe mu barwanyi b'umutwe wa FDLR

Ntibibaza avuga ko abarwanyi bari mu ntara ya Maniema, Katanga Kivu y’Amajyaruguru na Kivu y’Amajyepfo ariko ngo abenshi bari muri Kivu.

Agira ati “Sinibuka uduce bagiye barimo bose, ariko abarwanyi benshi bari muri Kivu kuko Kivu y’Amajyepfo ifite ibihumbi bibiri abandi bakaba muri Kivu y’Amajyaruguru naho abari muri Maniema na Katanga FDLR Foca ntibagenzura.”

Ntibibaza avuga ko ariyo mibare yasize yanditse mu bitabo, kandi raporo zikorwa buri gihe zivuye ku dutsiko tw’abarwanyi bari ku birindiro zikoherezwa ku buyobozi bukuru.

Ntibibaza wagiranye ikiganiro n’ikinyamakuru Kigali Today tunakesha iyi nkuru, avuga ko muri Kivu y’Amajyepfo, abarwanyi ba FDLR biganje mu duce twa Kirembwe, Mirenge, Hiwabora na Rulimba, aho bayobowe na Col Helerimana Hamada uzwi ku mazina ya Bola Uzima ubarizwa Kirembwe.

Kivu y’Amajyaruguru abarwanyi benshi bari mu duce twegereye u Rwanda nka Nyiragongo, Rutshuru na Masisi ariko ubuyobozi bukuru buba Walikale, Gerard akavuga ko ahari abarwanyi benshi ari Rutshuru na Walikale.

Uyu mugabo ugaragara ko adakuze cyane, avuga ko umubare atanga atari abarwayi cyangwa abana nkuko imiryango mpuzamahanga ibivuga, ngo ni abarwanyi bari mu birindiro kandi bafite intwaro.

Avuga ko raporo zikorwa n’impuguke ari incurano, kuko nta bantu bahura n’ubuyobozi bw’igisirikare cya FDLR.

Ati “Ninjye wari ushinzwe ubuyobozi bw’igisirikare cya FDLR, nta mpugucye nimwe navuganye nayo, nta n’iyigeze igera mu buyobozi bwa FDLR, imibare batangaza sinamenya aho bayikura wenda barayimba.

Naho imibare twe dufite mu bitabo iva ku birindiro by’abasirikare bacu ikagenda izamuka kugeza ku nzego zo huejuru.”

Ntibibaza avuga ko abarwanyi ba FDLR kugera kuri 90% bafite intwaro n’ubwo badakunda kuzigendana kubera kwihisha.

Naho inkomoko y’ibikoresho bya gisirikare FDLR ibitse, avuga ko yabihawe na Leta ya Congo, ibindi abarwanyi babigura n’ingabo z’iki gihugu n’imitwe yitwaza intwaro nka Mai Mai.

Akomeza avuga ko FDLR itagira ububiko bw’ibikoresho bizwi, ahubwo ibikoresho ibibika mu bwihisho mu birunga bya Nyiragongo na Nyamuragira kugirango bidafatwa n’ingese ngo byangirike.

Ntibibaza Gerard  a.k.a Mambo Lorenzo wahoze mu buyobozi bukuru bwa FDLR

Avuga ko hari igihe bibagirwa aho babihishe bikazimira. Nyamuragira iruka muri 2013 hari ibyo yarukiye aho bihishe harasibangana

Kubirebana no kongera umubare w’abarwanyi, Ntibibaza avuga ko imwe mu mpamvu FDLR ifata bugwate impunzi z’Abanyarwanda ziri mu burasirazuba bwa Congo ari uko ariho abarwanyi bava.

Ati “Ahantu hambere FDLR ikura abarwanyi ni mu mpunzi z’abanyarwanda ziri mu burasirazuba bwa Kongo, ahandi ni mu bakongomani ariko bo ntibaramba iyo bamaze kubona imyitozo bigira mu mitwe yabo bakaba abayobozi.

Ahandi havaga abarwanyi ni muri Uganda ariko byarahagaze bitewe n’uko iyo bageze mu mashyamba ubuzima bubananira bagatoroka bagasubirayo dusanga duta igihe.”

Ubuzima bw’abarwanyi ba FDLR bwa buri munsi

Abarwanyi ba FDLR mu mashyamba ya Congo batungwa no guhinga cyangwa gucuruza, abatabikoze bagasahura abaturage ba Congo.

Yemeza ko hari uduce twinshi muri Kivu y’Amajyaruguru FDLR iyobora ikaba ariyo ishyiraho ubuyobozi kubera ko ingabo n’abapolisi ba Kongo batahagera.

Ati “Ingabo n’igipolisi bya Kongo bikunda mu mujyi nahari imihanda, FDLR yo ijya ahatari iyo mihanda n’imijyi. Irategeka ndetse ikanasoresha, ikagira n’uruhare mu gushyiraho inzego z’abayobozi.”

FDLR yinjiza amafaranga atari macye ikura mu bucuruzi

Byagaragaye muri raporo y’ishami ry’umuryango wabibumbye rikorera muri Congo Monusco mu 2014, ko abarwanyi ba FDLR binjiza miliyoni 71 z’amadolari y’Amerika buri mwaka avuye mu bucuruzi bw’urumogi n’amakara.

Ntibibaza nawe yabyemereye Kigali Today ko hari abarwanyi bashinzwe gukora ubucuruzi bw’igice cy’igisirikare cya FDLR hamwe n’igice cya politiki.

Yongeraho ko hari n’abandi barwanyi bashinzwe kwinjiriza amafaranga abayobozi babo, kugira ngo babeho neza. Abo bayobozi ari nabo bagira uruhare rwo kubuza impunzi n’abarwanyi gutaha kuko babona ntacyo babuze.

Kuba ingabo za Congo zidashobora gusenya umutwe wa FDLR, Ntibibaza avuga ko biterwa n’uko mu gisirikare cya Congo harimo abasirikare bakorana na FDLR bakayiha amakuru mbere yo kuyitera.

Ati “Ingabo za Congo ni nyinshi kandi zifite ibikoresho ariko kuba zidasenya FDLR biterwa nuko harimo abakorana na FDLR bakayiha amakuru nayo ikabaha amafaranga. Ibi bigatuma FDLR yitegura ibigiye kuyikorerwa.”

Ntibibaza avuga ko n’ubwo ingabo za FARDC zigira abazimenera amabanga, zibishatse zigafatanya n’ingabo za Monusco bahashya FDLR, ariko kuba bitaba kuri we abona ko hari ikindi kibyihishe inyuma.

Hakunze gufatwa ingamba nyinshi zo kurandura burundu umutwe wa FDLR ku butaka bwa Congo ariko ntibyakunze ndetse hari n’abakurikiranira hjafi politike yo mu karere bakunze gutangaza ko ibihugu by’ibihangange bifite inyungu z’ubutunzi mu kutarwanya uyu mutwe wiganjemo abasize bakoze jenoside mu Rwanda nk’uko u Rwanda rwakunze kubivuga.



Amazina
E-mail
Igitekerezo