Abapolisi 63 bo ku rwego rwa ofisiye bazayobora abandi mu butumwa bw’amahoro mu gihugu cya Centrafrika basoje amahugurwa y’iminsi itatu yaberega ku cyicaro cya Polisi y’u Rwanda ku Kacyiru. Umuyobozi mukuru wa Polisi y’u Rwanda IGP Emmanuel K. Gasana asoza ayo mahugurwa ku mugaragaro, yabasabye kuzarangwa n’indangagaciro nyarwanda kugira ngo bazakore neza akazi kabo.  Yababwiye ko aho bazakorera bazahura na bagenzi babo bo mu bihugu bitandukanye, bityo abasaba kuzabasangiza ubumenyi n’imyitwarire iranga  abapolisi b’u Rwanda aho bakorera hose ndetse nabo bakazagira ibyiza babigiraho mu gihe bazaba bakorana akazi.

 

By Ubwanditsi | Views : 12033 | Kuya 09-24-2015 05:23



IGP Gasana akaba yasabye aba bapolisi kuzayobora bagenzi babo neza bababera intangarugero mu kazi, bafatanya nabo, bibuka kwirinda no kurinda ibikoresho by’akazi n’aho bakorera, bagashyira mu bikorwa inshingano zabo.

Umuyobozi mukuru wa Polisi y’u Rwanda yakomeje abasaba kuzaharanira ishema ry’igihugu cyabo muri ubwo butumwa bw’amahoro bityo uko bagiye muri ako kazi bakazagakora neza kandi bose bakazagarukana ishema mu gihugu cyabo.

Uwavuze mu izina ry’abo bapolisi bazajya mu butumwa bw’amahoro muri Centrafrika CSP Réverien Rugwizangoga, yavuze ko muri aya mahugurwa bahawe ubumenyi butandukanye n’abayobozi bakuru ba Polisi babibutsa amahame y’Umuryango w’Abibumbye. Muri ubwo bumenyi bahawe harimo gufata neza ibikoresho no kubicunga neza, kurwanya ihohoterwa rishingiye ku gitsina, kuyobora neza abapolisi bari mu butumwa bw’amahoro, no gukemura ibibazo bijyanye no kuba bakorera kure y’imiryango yabo.

Yasoje yizeza ko bazakorana umurava akazi kabo igihugu kiboherejemo. Bikaba biteganyijwe ko aba bapolisi na bagenzi babo bazerekeza muri Centrafrika mu butumwa bw’amahoro mu minsi iri imbere, bakazagenda bari mu byiciro bibiri bitandukanye.



Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd